Ini depe bahasa manado. 
Tata cara ba coblos tanggal 17 April 2019 ala milenial kawanua

1. Jang lupa mandi, ba bedak deng pake kasana minya wangi. Sapa tahu mo baku dapa deng ngoni pe jodoh masa depan.
2. Musti datang di TPS karna ini bukang Indonesian Idol yang voting pake SMS.
3. Inga ne TPS buka dari jam 7 pagi sampe jam 1 siang. Nyanda buka 24 jam
4. Pigi di TPS sesuai undangan jangan pasiar pa orang pe TPS padahal nda ada nama.
5. Antri di TPS kong tertib, karlota sadiki boleh asal jang baribut. Kong jang harap mo dapa kukis deng aqua. Ini bukan hari jadi apalagi pengucapan.
6. Nda usah ba lama-lama di bilik suara, nda perlu ba selfie apalagi update status. Banyak yang antri di luar.
7. Buka surat suara kong coblos sesuai pilihan. Nda usah live di fb karna ngana pe suara cuma ngana deng Tuhan yang tahu.
8. Nda usah baca satu-satu tu nama karna tetap cuma satu tu mo pilih di tiap surat suara. So tahu to dari sosialisasi deng kampanye.
9. Jang pilih yang cuma banya deng janji. Karna sedangkan yang so baku janji banya yang nda jadi kenyataan.
10. Pilih jo sesuai hati nurani nda perlu deng jiwa. Supaya kalo nda tapilih cuma mo saki hati nyanda mo saki jiwa.
11. Coblos pake alat yang so tasadia di bilik suara. Nda perlu kase lobang basar skali biar le ngana gemes pa tu calon ato paslon.
12. Kalo so kelar coblos lipa ulang tu surat suara bagus-bagus. Mar nda perlu mo strika, cuma kwa mo isi di kotak.
13. Cari kotak suara kong isi surat suara sesuai depe kotak. Jang bawa pulang itu surat suara karna itu bukang kupon alfa/indomaret
14. Kelar itu colo tu jare di botol tinta. Cukup satu jare jo jang samua. Itu bukang kutex.
15. Abis itu so boleh pulang, mar kalo masih mo tinggal nda apa no yang penting jang baribut baganggu tu laeng. Apalagi mo ator meja kong main kartu.
16. Jangan bawa makang kong ngoni makang rame-rame karena ini bukang piknik apalagi kumaus.
17. Yang mo pulang langsung di rumah kong berdoa akang supaya ngoni pe pilihan tu jadi.

Jang lupa ne musti bapilih tanggal 17 April nanti, bukang 17 Agustus 😅

#edit saleng tempel 😅🤣.                  (tamang ada kirim di grup sabla)